محمد کاظم امینی اوز کتابیده 53 كيشي شاعر وشاعره نينگ بيو گرافي واثر نمونه لرينی سيغديرگن

تذكره يازيش عنعنه سي ، شرق ادبياتي نينگ قديمي عنعنه لريدن بيري دير

معلوم كه هر بير ادبي دورده يوزلب شاعر وايجاد كار انسانلر يشه گن ، ليكن اولرنينگ برجه سي ايريم دليل لر، جمله دن ديوان توزيشگه قادر بولمه گني ، ياكه مطبوعات بولمه گن دور لرده اوز دبوانلريني تورلي نسخه لرده كوچيريب قالديره آلمسليكلري باعت، بيزگه چه توليق يتيب كيلمه گن

شرق ادبياتي تاريخيده گي بيزگه چه يتيب كيلگن
‌‌‍‍« تذكره » اثرلرايسه ادبيات تاريخي ساحه سيده كتته اورين گه ايگه بولگن . چونكه بو تذكره لر، گمنام ليكده يشه ب ايجاد ايتگن شاعرلر اثرلريني ته نيتيش واولر حقيده گي معلوماتني بيزگه ييتكزيش اوچون كتته خدمت قيليب كيلماقده

.

عليشير نوايي نينگ « مجالس النفايس » ناملي تذكره سي ، اونلب توركي گوي شاعرني واولرنينگ اثر نمونه لريني 15 نچي عصردن توريب ، بيزگه ته نيته دي

بيز اوتگن هجري شمسي ييلده «افغانستانده گي اوزبيك شاعرلري» عنوانلي بير تذكره نينگ نشر ايتيليشي گه گواه بولديك

كتاب « اميني تذكرة الشعراسي » حقيده گي پوهندوي سيد محمد عالم لبيب نينگ تقريظ مقاله سي بيلن باشلنه دي

مؤلف ،اوزي يازگن سوز باشي سيده كتاب نينگ يره تيليشي سبب لري واوني قلم گه تارتيش يوليده گي اينتيليش لري خصو صيده سوز يوريتيب ، كتاب كم چيليك لريني تولديريش ده اوز تيلداش و قانداش قلم كشلريدن ياردم سوره يدي

تذكره ده 53 كيشي شاعر وشاعره نينگ بيو گرافي واثر نمونه لري سيغديريلگن

بولردن 27 كيشي سي يقين واوزاق اوتميشده وفات ايتگن شاعر لر بولسه - ده، 26 كيشي سي ايسه حيات قيديده گي زمانداشلريميزدن عبارت

خلاصه شوكه، حرمتلي اميني يازگن تذكره سونگي ايكي – اوچ عصر مابيني ده يشه ب ايجاد ايتگن افغانستان اوزبيك شاعر لري خصوصيده معلومات بيرووچي اثر صفتيده كتابخوانلر قلبي گه يول آچه ي آليشي آرزوسي بيلن بو كتابدن بير غزلني خواننده لرگه حواله ايته ميز

محبت شعله سي

جنيدالله «حاذق»دن

يوزينگ كورگاج كورالمام طاقت اشكيم هجومينده
نيچوك كيم تاب قالمس مهردين ، گردون نجومينده
خيالينگ بيرله سين سيز دوش شيرين كام اولميشديم
مگر كيم وصل ترياقي ايدي هجران سمومينده
سينينگ حسنينگ كبي زلفينگ ايله نظاره كورگان يوق
نه كاكل شام زنگينده ، نه عارض صبح رومينده
نيچوك كيم صبحدم رنگين قوياش نينگ پنجه سي اولميش
سر افراز ايت صبا توپراغيمي ، ياريم قدومينده
چوچوك سوزي بيله ياريمدن ايرو بولماغيم ممكن
ايرور نوشيغه نيش انداق كه بو لميش شهد مومينده
لب لعلينگ، تيشينگ ابله سوزينگني آب و رنگيدن
ساچار جوهر تنوريده ، تيرار گوهر نظومينده
ايرور كورگاچ زمان جان بيرماق عاشقلرغه هم وا جب
قان ايچمك گر روا ايرميش ، پريرولر رسومينده
محبت شعله سيدن بولماغان يوز داغ دنيا تينگ
قني بير شمع مزارينده ، قني بير لا له بومينده ؟
ني تانگ اير ميش اگر حاذق ني كلكيدين شكر تامسه
چو يوق وصف خطينگ دين اوزگه بير مضمون رقومينده

بيبليو گرافيك معلومات

كتاب نامي : افغانستانده گي اوزبيك شاعر لري
 مؤلف : الحاج محمد كاظم اميني

- چاپ ييلي: 1385

- ناشر : قلم انجمني

 چاپ ييري : ميوند مطبعه سي ، كابل

- تيراژ : 1000 جلد

 سايز : 210 ضرب 140 ملي متر

 صحيفه لر ساني : متن 232 صحيفه + مندرجه 3 صحيفه + تقريظ وسوزباشي 7 صحيفه

 كاغذ : بيرينچي سورت

مقوا: رنگلي وجلا لي كاغذ